متلي متل كيس فاضي
ورق وللا بلاستيك؟ شو الأرخص؟
كان ممكن يتملا أشيا حلوة متل تفاح
متل علبة ألوان
أو تياب جديدة
ممكن تياب قديمة؟ للصدقة؟
تياب وسخة؟ للمغسلة؟
زبالة؟
متلي متل كيس فاضي
الأكيد إنه فاضي
عم يطيح فيه الهوا ينقله شمال ويمين؟
وللا معلق بغصن شجرة يترقوص للرايح والجاي؟
يمكن منزوي بخرابة بين أكوام الزبالة
يمكن مرمي بالطريق معبى طين
متلي متل كيس فاضي
بالهوا دايخة صلي يهدا الهوا وارتاح؟
معلقة بغصن خايفة ينكسر وأرجع طير؟
وللا وحيدة بكومة زبالة في خرابة منسية ناطرة شي اتنين يلتقوا بالخفية أو حتى جثة قتيل بتترمى ليتغير عليي المنظر؟
متلي متل كيس فاض
بالوحل ووسخ الطريق معلق باطرافي، بتفرج على العالم تروح وتجي تحب وتفارق وأحلم لو ينزل المطر وينظف الطريق و يعلى الهوا وياخدني يطيرني معه من أول وجديد
