الطريق

صوت الراديو عالي
و مزاجي في النازل 
قدامي عواميد النور زي الحرس
مصفوفة
و الطريق طويلة 
و العقل غافل
اشارات و لوحات ملونة
امشي من هنا
لأ, الأحسن من هنا
قدامك أمان يا شابة

صوت الراديو عالي
و قدري وضيع
ما فيش اختيارات في الدرب
اللي تبعد عنّي الحبيب
ما فيش غير الطمأنة
الوعد بيها
والروح مسكونة بالوهم 
العينين بالهمّ
و القلب ملعون

أه يا روح غريبة
لو كان القدر زي الطريق
مضوي
و الحظ على جنابه مصفوف
لو للغالي عنوان  
 لو لعينيه رمز
و الوصول اليه معروف
صلّي للرب يمكن 
للدعا يسمع, يمكن  
تعرف في يوم 
للحبيب تشوف