الكلمة اللي تقتل و النصل اللي بيدبح
بينزّ الدم زي كابوس بشع
و تشوف وشك بينعكس عليه
قد ايه البقعة اللي بيعملها الدم كبيرة
قد ايه يحلوّ الضياع في كرهه
.
تقوم
تقف
أخيراً
تقف على حيلك
و تقرر الكره طريقك
و الحقد اول الخطوات
و الانتقام اخرها
و انت و هو و الزمن الطويل
.
ساعات من الهلس الجنوني في محاولة يائسة لإيلامه
ساعات من الانتحار الروحي
في محاولة بمعدلات نجاح بسيطة
لجعله يندم
عليّ صوت الموسيقى على الاخر
و اقفز في نص الدم زي الملسوع
ما انت يا حبة عيني شبه ميت
الحقد أكل وشك
و الدمع جرّح اهدابك
خبّط برجليك على ارض الكفر
ارض الواقع
خبّط عليها يمكن تتكسر
خبط يمكن تنهار الارض معاك
خبّط برجليك الحافية على أدمية زائفة و انسانية للمدللين بس
خبّط ....حد عارف جهنم اللي تحت الارض شكله إيه
خبّط
مش يمكن يكون احسن من الوجع اللي انت فيه
خبّط
مهو مش معقول تموت من غير ما ترفّس
ليست هناك تعليقات:
إرسال تعليق