expr:class='"loading" + data:blog.mobileClass'>

الجمعة، 21 فبراير 2014

فريندلي

كل شي بتمناه حاليا انك ما تحذفي الرسالة قبل ما تقريها...
انا بعرف انك ما رح تندهشي ؟
انت اكتر وحدة بتعرف الطقات اللي بتجي براسي و كيف بعملها بسرعة
المناسبة لهالرسالة الغير متوقعة - و يمكن حتى مش غريبة - المناسبة هي اني حلقت الفريندلي...
او اللحية متل ما كنت تسمّي شوية الشعر اللي على دقني...
تتذكري مرة عدينا خلال الاسبوع عدد المرات اللي كنت بتطلبي مني حلقها؟
المهم, اليوم الصبح قررت هيك اني احلقها..
ليش يا ترى؟ مابعرف 
و يمكن كرمال هيك عم بكتبلك
ظلينا مخطوبين سنتين و قبلها سنة تعرفنا فيها على بعض و ما كنت اقبل احلقها...
مو بس هيّ, كل شي ما كنت اقبل غيّره..
هلأ و اليوم و انا عم بطلع بحالي بالمراية و بعد ما حلقتها للفريندلي عرفت انّي كنت بعنّد معك و بس...
انا بعترف اليوم اني كنت بتصرف بشئ من العناد معك...
و مع علاقتنا...
يمكن كان غرور
يمكن كنت متطمّن إنك بتحبيني
المهم انك ما تحملتي...
ما تزعلي و تعصبي , انا ما عم بتّهمك ..
انا بس عم ردّد شو قلتيلي لمن شلحت خاتم الخطبة ...
يمكن عم بحاول زعلك شوي....
و يمكن عم حاول رجعك عن قرارك...
صار إلنا شهرين و ما فيني لسّه أتعود على فكرة انك تركتيني...
ما بدي قول فكرة اني عايش بدونك لاني بحاول حافظ على شوي من عزة النفس
إيه يا أمل ...
فضّل قول إني رجال متروك من ست على اني قول اني رجال اكتشف قديش صعب يعيش من دون الست اللي حبّها و حلم معها بمشاريع شغله و بيته...
شفتي يا أمل كيف تحولت الرسالة؟
شوي و رح اركع و اطلب منك ترجعي؟
بس لا أنا رح اركع
كنت عملتها في كل مرة كنت بتبكي و تهدديني بفكّ الخطبة
و لا انت رح ترجعي
لانك ما بترجعي عن شي يا أمل ...
ما بترجعي
كنت مفكر اني رح اكتبلك كلمتين و ابعتهن بماسج على تلفونك بس على كترة الحكي يمكن ابعتهن ع الفيس

انشالله ما تكوني عاملتلي بلوك؟...

المهم اني مصّر انك تقريها لهل الرسالة حتى لو اضطريت اكتبها على الزفت قدام باب بيت اهلك....
....
مين عارف؟
ما يمكن متل ما انا حلقت الفريندلي, إنتي كمات تتراجعي و ترجعي؟
يا أمل؟

هناك تعليقان (2):

  1. شي يوم , يمكن يجمعنا شي مشترك
    عمل روائي / قصصي نقدمه بأسمنا نحنا الـ 2
    كتابتك حلوة كتير يا إيبي .... خليكي عم تكتبي و أنا رح أبقى عم اقرألك ^_^

    ردحذف
  2. ميرسي طارق...ما في احلى من انو الواحد يكتب اللي بيحبه و بيلاقي ناس بتقراه ..... و اقتراحك حلو كتير ....شد الهمة .....:)

    ردحذف